ایشیا کپ فائنل : شعیب ملک کے ٹوئٹ پر ثقلین مشتاق بھی بول پڑے

ایشیا کپ کے فائنل میں شکست پر شعیب ملک کی جانب سے کیے گئے ٹوئٹ پر مختلف کھلاڑیوں کا ردعمل سامنے آرہا ہے قومی ٹیم کے ہیڈ کوچ ثقلین مشتاق نے بھی خیالات کا اظہار کردیا۔
گزشتہ روز دبئی میں پریس کانفرنس کے دوران شعیب ملک کے ٹوئٹ کے حوالے سے کیے گئے سوال پر ثقلین مشتاق نے ہنستے ہوئے کہا کہ اس پر میں کیا ردعمل دوں؟ آپ کی یاری دوستی ہر کسی کے ساتھ ہونی چاہیے یا دشمنی ہونی چاہیے؟

انہوں نے مزید کہا کہ میرا یہ ماننا ہے کہ ہم زمین پر رہتے ہیں تو کرکٹ یا کسی اور ڈپارٹمنٹ میں یاری دوستی تو ہر کسی سے ہونی چاہیے، خالی دو یا چار پانچ قریبی لوگوں سے نہیں ہونی چاہیے۔
انہوں نے مزید کہا کہ مجھے نہیں معلوم یہ کس قسم کی ٹوئٹ ہے اور میں اس کا کیا جواب دوں؟

اس سے قبل کامران اکمل نے بھی اس حوالے سے ٹوئٹ کیا اور شعیب ملک سے مخاطب ہوتے ہوئے کہا کہ استاد جی، اتنے صاف گو نہ ہوں۔
واضح رہے کہ گزشتہ روز ایشیا کپ کے فائنل میں سری لنکا کے ہاتھوں شکست کے بعد سماجی رابطے کی ویب سائٹ ٹوئٹر پر شعیب ملک نے ایک پیغام جاری کیا تھا جس میں انہوں نے ٹیم کا نام لیے بغیر تنقید کی۔

شعیب ملک نے کہا کہ ہم کب دوستی، پسندیدگی اور ناپسندیدگی کے کلچر سے باہر آئیں گے، اللّٰہ ہمیشہ ایماندار کی مدد کرتا ہے۔
یاد رہے کہ دبئی میں کھیلے جانے والے ایشیا کپ 2022 کے فائنل میچ میں سری لنکا پاکستان کو شکست دے کر چھٹی مرتبہ ایشین چیمپئن بن گیا۔

سری لنکا کی جانب سے دیے گئے 171 رنز کے ہدف کے تعاقب میں قومی 147 رنز پر آل آؤٹ ہو گئی تھی،محمد رضوان اور افتخار احمد کے علاوہ کوئی بھی کھلاڑی خاطر خواہ کارکردگی نہیں دکھا سکا۔

اپنا تبصرہ بھیجیں