کراچی میں سمندری طوفان کا خدشہ ہے۔ محکمہ موسمیات نے اگلے 24 گھنٹوں کے دوران بحیرہ عرب میں طوفان بننے کی پیشگوئی کر دی۔ بارش کے پیش نظر متعلقہ ادروں کو حفاظتی اقدامات مکمل کرنے کی بھی ہدایت جاری کر دی گئی۔
اس وقت بحریہ عرب میں شدید ہوا کا کم دباؤ ہے جو ڈیپ ڈپریشن کی شکل اختیار کرسکتا ہے اگر طوفان بنا تو اس کا نام شاہین رکھا جائیگا، جو قطر کا تجویز کردہ ہے۔ اس سے قبل 2007 میں بھی اسی طرح کا سائکلون بنا تھا۔ چیف میٹرولوجسٹ سردار سرفراز کے مطابق شہر میں اربن فلڈنگ کا خطرہ ہے۔ ہواؤں کی رفتار 70 سے 80 کلو میٹر فی گھنٹہ تک بڑھ سکتی ہے۔
دوسری جانب تیز ہواؤں کے باعث فریئر ہال پارک کے قریب بجلی کا پول گاڑی پر گرگیا۔ ایک درخت بھی تیز ہواؤں کے باعث اکھڑ گیا، واقعہ میں کوئی جانی نقصان کی اطلاع نہیں۔ محکمہ موسمیات کے مطابق رات میں تیز بارش ہوسکتی ہے۔ جبکہ کل شہر قائد میں موسلا دھا ر بارش کا امکان ہے۔
وزیر بلدیات سندھ ناصر حسین شاہ کی زیر صدارت اجلاس بھی ہوا، جس میں ہنگامی صورت حال کی صورت میں فوری اقدامات کی ہدایت کی گئی۔ صوبائی ڈیزاسٹر منیجمنٹ اتھارٹی نے متعلقہ اداروں کو حفاظتی اقدامات کرنے کی ہدایت جاری کر دی جبکہ ڈی ایم سی سینٹرل علی زیدی کے احکامات پر ناگن چورنگی اور اس سے ملحقہ علاقوں میں ہیوی ڈیوٹی، ٹرک ماونٹڈ پمپ لگا دیئے گئے ہیں