سندھ ہاﺅس میں پولیس گردی ہوئی تو نتائج کے ذمہ دار وزیراعظم اور وزیرداخلہ ہونگے

سابق تین وزرائے اعظم نے سیکریٹری داخلہ، پولیس اور اسلام آباد انتظامیہ کے حکام کو خبردار کردیا ہے۔

سابق وزرائے اعظم سید یوسف رضاگیلانی، راجہ پرویز اشرف اور شاہد خاقان عباسی کا مشترکہ بیان سامنے آیا ہے۔
ان کی جانب سے جاری کیے جانے والے بیان میں کہا گہا ہے کہ سندھ ہاﺅس میں آج رات پولیس گردی کی گئی تو نتائج کے ذمہ دار عمران خان اور وزیرداخلہ ہوں گے۔

بیان کے مطابق انہوں نے سیکریٹری داخلہ، پولیس اور انتظامیہ کے حکام کو خبردار کرتے ہیں کہ کسی سیاسی عمل کا حصہ نہ بنیں۔

انہوں نے کہا کہ تحریک عدم اعتماد کے آئینی عمل میں پولیس اور انتظامیہ فریق بنی تو یہ آئین شکنی اور آئین شکنی کرنے اور ان کی مدد کرنے والوں کو سزا کے لئے تیار رہنا ہوگا۔

ارکان قومی اسمبلی کے خلاف پولیس گردی پارلیمنٹ پر حملہ تصور ہوگا اور پارلیمنٹ لاجز والی حرکت سندھ ہاﺅس میں دوہرائی گئی تو سنگین نتائج برآمد ہوں گے۔

سابق وزرائے اعظم کا کہنا ہے کہ عمران خان172 ارکان لا نہیں پارہے، پولیس اور انتظامیہ کے ذریعے ان کے اغواء کی تیاری ہے اور ان کے اوچھے ہتھکنڈے اعلان ہیں کہ عمران خان اکثریت اور ایوان کا اعتماد کھو چکے ہیں۔

انہوں نے واضح کیا ہے آئین کے راستے پر چلتے ارکان پارلیمان کے خلاف آئین شکنوں کا حملہ دہشت گردی اور لاقانونیت ہوگی اور آئین، جمہوریت اور پارلیمان پر حملہ کرنے والوں کو کٹہرے میں کھڑا کریں گے۔

ان کا مزید کہنا تھا کہ پولیس گردی اور آئین شکنی پر اسپیکر قومی اسمبلی کی لاتعلقی، مجرمانہ خاموشی ثبوت ہے کہ وہ آئین کے بجائے پارٹی لیڈرکے تابع ہیں۔