سیکیورٹی فورسز کا بنوں کے علاقے بکاخیل میں انٹیلی جنس پر مبنی آپریشن میں فائرنگ کے تبادلے میں 8 خوارج جہنم واصل ہو گئے، جبکہ میجر عاطف سمیت 3 اہلکار شہید ہو گئے۔
پاک فوج کے شعبہ تعلقات عامہ (آئی ایس پی آر) کے مطابق فائرنگ کے تبادلے میں 8 خوارج کی ہلاکت کے علاوہ 7 خوارج زخمی بھی ہوئے ہیں۔
شہدا میں پاک فوج کے 31 سالہ میجر عاطف کے علاوہ 36 سالہ نائیک آزاد اللہ اور 35 سالہ لانس نائیک غضنفر عباس بھی شامل ہیں۔
آئی ایس پی آر کے مطابق پاک فوج کے جوانوں نے بہادری کے ساتھ لڑتے ہوئے جام شہادت نوش کیا۔
علاقے سے خوارج کے خاتمے کیلئے سیکیورٹی فورسز کا کلیئرنس آپریشن جاری ہے، سیکیورٹی فورسز دہشت گردی کی لعنت ختم کرنے کیلئے پُرعزم ہیں۔