وزیراعلیٰ پنجاب سردار عثمان بزدار سے وفاقی وزیر مملکت محمد شبیر علی قریشی کی ملاقات، باہمی دلچسپی کے امور، عمومی سیاسی صورتحال اور ہاؤسنگ سے متعلق تبادلہ خیال.
عثمان بزدار نے کہا کہ عوام کو اپنی چھت فراہم کرنے کا وعدہ نبھائیں گے، لاہور میں 180 ارب روپے کی لاگت سے 35 ہزار سستے اپارٹمنٹس بنائیں گے، پہلے مرحلے میں لاہور کیلئے 4 ہزار اپارٹمنٹس کی تعمیر کا پراجیکٹ شروع کیا جا رہا ہے-
انہوں نے کہا کہ ایل ڈی اے کے قوانین میں بزنس فرینڈلی اصلاحات کے حوصلہ افزاء نتائج سامنے آ رہے ہیں، ایل ڈی اے بلڈنگ اینڈ زوننگ ریگولیشن میں ترامیم کے ذریعے ہائی رائز بلڈنگ کی تعمیر کو فروغ ملے گا- دریں اثنا لاہور میں ہائی رائز بلڈنگ بننے سے اربوں روپے کی سرمایہ کاری اور روزگار کے ہزاروں مواقع پیدا ہوں گے-
مزید برآں ایز آف ڈوئنگ پالیسی کے تحت عمارتوں کے نقشوں کی منظوری کا عمل 30 دن میں مکمل کرایا جا رہا ہے، کوٹ ادو سمیت پنجاب کے ہر پسماندہ اور نظر انداز علاقوں کو ترقی کے یکساں مواقع دے رہے ہیں۔
وزیر مملکت شبیر علی قریشی نے کہا کہ عثمان بزدار کی نئی سوچ کا کمال پنجاب بھر میں نظر آرہا ہے، ان کا یکساں ترقی کا ویژن ہر لحاظ سے لائق تحسین ہے، ملاقات میں صوبائی وزیر ہاؤسنگ اسد کھوکھر بھی موجود تھے۔