راولپنڈی میں اینٹی نارکوٹکس فورس (اے این ایف) کی جانب سے کی گئی کارروائی کے نتیجے میں بھاری مقدار میں منشیات برآمد کرلی گئی ہے۔
تفصیلات کے مطابق کارروائی ایئرپورٹ ہاؤسنگ سوسائٹی راولپنڈی میں واقع کوریئر کمپنی کے دفتر پر کی گئی ، جس کے نتیجے میں کراکری کے سامان پر مشتمل پارسل سے 1 کلو 750 گرام ہیروئن برآمد کرلی گئی ہے۔
ترجمان اے این ایف کا کہنا ہے کہ مذکورہ پارسل برطانیہ کے لیے بک کروایا گیا تھا، ملزمان برطانیہ میں موجود پارسل وصول کرنے والے ملزم کے ساتھ رابطے میں تھے۔
ترجمان اے این ایف نے بتایا کہ دورانِ کارروائی کمپنی کے مالک سمیت 3 ملزمان کو گرفتار کر لیا گیا ہیں، گرفتار ملزمان میں کمپنی کا مالک اسماعیل، نبیل اور رضا حسین شامل ہیں۔
ترجمان اے این ایف نے مزید بتایا کہ ملزمان کے خلاف انسداد منشیات ایکٹ کے تحت مقدمہ درج کر کے مزید تفتیش کا آغاز کر دیا گیا ہے۔
واضح رہے کہ کچھ دن قبل بھی اینٹی نارکوٹکس فورس (اے این ایف) اور اے این ایف کراچی نے شہر قائد میں مشترکہ کارروائی کرتے ہوئے بھاری مقدار میں منشیات برآمد کی تھی۔
کارروائی الآصف اسکوئر کے قریب کی گئی تھی جہاں تین ملزمان کے قبضے سے 3.030 کلوگرام منشیات برآمد کی گئی تھی۔
ترجمان اے این ایف کے مطابق ملزمان کو منشیات کی خرید و فروخت کے دوران رنگے ہاتھوں گرفتار کیا گیا، گرفتار ملزمان میں چاغی کے رہائشی راشد اور فضل الرحمن جبکہ سانگھڑ کا رہائشی محمد رفیق شامل ہیں۔